Arunachal & Manipur nung bendangertem miter

Imphal/Itanagar, Aenjeti (January) 5 (Agencies): Arunachal Pradesh aser Manipur kübok Assam den arrtsüa aliba tesemtem nung ozüng alema arurtem nüka mitba mapa akangshiogo.
National Register of Citizens (NRC) reprangshimba nung nisung crore 3.29-i tenüng agütsü saka parnok rongnung crore 1.9 shi ka dang first draft nung dena lir. Iba ajanga Assam den arrtsüa aliba state ana nung ketdangsertemi tenüng madenertem parnok state nung arua jenoktsü akok ta temulung melemi bilemba agi nüka mitba maparen akangshi.
Assam state sorkari taruba draft tem nung tashishitsü maliba senso ajak züngoktsü ta metetdaktsüogo.
Arunachal Pradesh Chief minister Pema Khandu-i state DGP den senden ka amendang Assam nung NRC reprangshima adokba sülen state kübok arrtsülen mapa koba tashi inyakdar ta asüngdanga liasü.
Pema Khandu-isa DGP dang border outpost tem nung ozüng alema arurtem jungjunga mittsü atema mapa inyaktsü tetuyuba agütsü.
Arunachal DGP-ia chief minister dang border district SP tem nem osang sangoktsüogo aser parnok dang Assam police den osangtsüsang agitepa mapa inyaktsü tetuyuba agütsüogo ta ashi.
Manipur nunga N Biren Singh-i aniba sorkari Assam nungi ozüng alema arurtem aitba nokdangtsü atema mapa akangshiogo.
Assam den arrtsüa aliba tesemtem aser ano interstate highway tem nung tongtipang tesemtem nung security maparen talila tenzükogo, ta sorkar sangdong ka nung metetdaktsü.
“Assam den artsüa aliba Jiribam district tasen nung mapa akangshiogo” ta sorkar ketdangser kati ashi.
Tamenglong district kübok aliba Tamei-Haflong lenmang aser Nagaland den arrtsüa aliba Senapati district kübok Imphal-Dimapur highway nung Mao gate nung special team tem mapa lemzükja lir ta sorkar ketdangserisa shisem.