Arunachal media-i Manipur journalists pusemer

Itanagar, December 22 (Agencies) : Telungpur telok kati Imphal nung television editor ka amokmerenba atema Arunachal Pradesh nung media teloki Manipur journalists pusema nungitba metetdaktsüogo.
Osangbenertemi lokti atema bendanga agüja inyakba ajembanga telungpurtemi amokmerenogo. Iba inyakyim kukua aitsür, ta Arunachal Press Club (APC) president Chopa Cheda-i tanü ashi.
Manipur nung tawa tasen tentetba KCP-MJC teloki yimozülurtem amokmeren. KCP-MJC-i sangdong yokba madoktsüba atema parnoki yimozülur amokmeren. Parnokisa Impact Television, yimozülur Yumnam Rupachandra’er kima nung bomb ka yutsü.
Telungpurtemisa Rupachandra dang phone ajanga pa taküm agitsü amokmeren. Manipur nung journalist telok amokmerenbaji tang tasen masü, saka journalist temi tan tatalokbaji süoki ia bilemer, kechiyong telungpurtemi yimozülur tsübudaktsütsü atema hand grenade ka amshi.
Tawa tu All Manipur Working Journalists Union & Editors Guild Manipur-i Manipur Press Club nung rongdak senden ka ayongzüka agi aser iba mapang telemtetba aika agi aser state sorkar dang osangbenertem kümzüka ayutsü atema takhangba agüja liasü.
Parnok tejashi sayua Imphal nungi adokba osangkakettemi taoba Bodbarnü yimozülur tazüngla adok. Parnokisa pen-down strike, mener lungkak aitba aser Imphal nung ola madoki lungkak aitba sentongtem agiogo.
Ano, December 17, 2015 nüa osangkaket ka dang madok aser ghonda 24 atema local news bulletins maliasü.
Arunachal Press Club (APC), Arunachal Pradesh Union of Working Journalist (APUWJ) aser Arunachal Electronic Media Association (AEMA) nungeri Arunachal Pradesh media tenüng nung Manipur nung osangbenertem pusema nungitba sangdong agütsü.