Arunachal MLA Tirong Aboh den nisung 10 khaset

Itanagar, May 21 (Agencies): Arunachal Pradesh kübok Khonsa West constituency nungi MLA aser National People’s Party (NPP) candidate Tirong Aboh den nisung 10 tanü khaset.
“Tanep 11:30 ako meta MLA Tirong Aboh, par jabaso aser personal security officers (PSOs) ana dena nisung 11 khaset” ta Arunachal Pradesh DGP SBK Singh-i ashi.
MLA Aboh den par jabaso, election agent ka aser PSOs pezüji gari pezü nung mener Dibrugarh nungi Khonsa-i aodang len tom nung NSCN (IM) telungpurtem ta temulung melemi bilemertemi amak, ta DGP-isa metetdaktsü.
Tan assembly elections nung Aboh ya Khonsa West Assembly constituency nungi National People’s Party (NPP) candidate liasü.
Arunachal Pradesh Home Minister Kumar Waii-i “yimtenren tsütsü mangatettep aliba nung ajemdaker Aboh tepset ama temulung melemi bilemer” ta ashi.
“Ni iba inyakyim khukhua aitsür. Iba ama lendong ya kodanga matalokdang. Iba atema bushisüngdang ka asütsübaji kanga tongtipang. Yimten tsütsü tetokteper kati iba ya inyak” ta Home Minister Wai-i ashi.
Osang kar ajanga iba lendong nung nisung 7 asü ta ashi saka Director General of Police (DGP) SBK Singh-i nisung 11 asü ta osang jangjatsüogo.
NSCN telungpurtem ta temulung melemi bilemertemi tanep 11.30 ako meta 12 Mile tesem nung garitem dak injang khaloktsü, ta Singh-i ashi.
Iba lendong nung yiruba security officer ka Dibrugarh nung yaritepdar, ta paisa shisem.
Arunachal Pradesh Chief Minister Pema Khandu-i iba tatalokba osang angashia aoksaba metetdaktsü aser iba mapa inyakertem aputsü ta nangzük.
“Iba mapa inyakertem tatem tonga bushitsü. Tasürtem asoshi mang ayimer. Parnok tanüla anisüngzük ngudakjangma” ta Khandu-isa metetdaktsü.
NPP president aser Meghalaya Chief Minister Conrad K Sangma-i iba mapa aitsü aser Prime Minister’s Office o Union Home Minister Rajnath Singh dang mapa inyaktsü atema asüngdang.
“MLA Tirong Aboh (Arunachal Pradesh) aser par kinunger asüba osang angashia NPP aoksar aser jashir. Onoki iba taochi makaba inyakyim khukhua aitsür aser Rajnath Singh o PMO India dang aibelenertem anema mapa inyaktsü ayongzüker” ta Conrad-i metetdaktsü.
Külen, Arunachal Pradesh Congress Committee (APCC)-ibo state nung tensa majungba aser mepetmesü adokba atema Bharatiya Janata Party (BJP) dak tai tongloktsü.
“Tanü Centre aser state sorkartem kübok state nung MLA tem kümzüka melira, süra kodaser kecha masüba nübortem tiptema litettsü” ta Congress-i asüngdang.
“Iba tatalokba atema kanga dang temaba jenjang nung bushisüngdang ka asütsüla. State nung tensa majungba aser mepetmesü adokba ya Chief Minister Pema Khandu aser par BJP sorkar ajanga lir” ta parnokisa shisem.
Home Minister Rajnath Singh-ia Aboh tepsetba atema temulung raksaba metetdaktsü aser iba ya Northeast nung tensa raksatsütsü atema inyakba mapa ka lir ta metetdaktsü.
“Arunachal Pradesh nung MLA Tirong Aboh den nisung 11 tepsetba osang angashidang kanga aoksar aser temulung raksar. Iba mapa inyakertem ozüng tesashitiba agi merenshitsü” ta Union Minister of State for Home Affairs Kiren Rijiju-ia ashi.