Arunachal nung army jawan ka training nung asüba ajanga mepetmesü adok

Itanagar/New Delhi, May 15 (Agencies) : Deobarnü Arunachal Pradesh nung Army training nung jawan ka asüba atema tejashi nung jawan kari ketdangser ka dak teka sangshi.
Iba tatalokba sülen social media nung sepai kari bangdak ketdangsertem anema apusor ta prokshi, saka Army osang ka ajanga, iba amaji kecha matalok aser nisung tashii yiruyibong asüba mali, ta metetdaktsü.
Parnok külem medemer asüba osang angashia sepai pezü-pungu ka temulung raksa aser idangji par unit captain-i parnok mesüzüktsü merangdang mangatettep adoka raratep, ta army osang ajanga metetdaktsü.
Tanü sepaitem kilometer 10 jajatsü lia jawan tasüsangji tuku nung tashitsü atur ta ashi saka parnok unit nung medical officer-i pa temang tendanga reprangba sülen pa junga dang lir ta kuli agütsü. Iba jagi par medemertem jashia ain adok, ta parnokisa shisem.
Sepaisangji ali nung laoba sülen field medical facility-i anir oa anepalu saka pa taküm mekümzüktet. Iba tatalokba atema Army-i bushisüngdang ka asütsü tuyuogo, ta New Delhi nung Army ketdangser kati ashi.
Ano, Defence otongdar, Lieutenant Colonel Suneet Newton-ia, tilateri mangatettep ka adok, ta metetdaktsü.