Arunachal nung Assamese oshi school tem nung sayutsü

Guwahati December 21 (Agencies): Arunachal Pradesh sorkari taruba küm nungi school tem nung Assamese tasembuba oshi ama tanaben benokshitsü asoshi sentong lir.
Chief minister Pema Khandu-i Itanagar nung Mongolbarnü Asam Sahitya Sabha nungi züngsem parnok ti den senden ka akaba mapang iba tenangzükba ya agüja liasü.
“Chief minister-i onok dang taruba küm nungi tenzüka Arunachal nung English aser Hindi-medium school ajak nung Assamese oshi tasembuba oshi ka ama tanaben benokshitsüba atema jenjang tapet agitsü tenangzükba agütsüogo. Arunachal ya 1978 küm state maküm tsüngda Assam kübok aliba mapang nungbo Assamese ya school tem nung sayua liasü. Onoki onok kidanger state tem den sobaliba melentepba sentong balala asoshi ajungshia arudar, anungji parnoki school tem nung Assamese oshi tanaben benokshitsü asoshi tejangraba sayuba ya kanga tajung lir,” ta Sabha-i ashi.
Assamese oshi school tem nung tanaben benokshitsüba osang ya Chief Minister Khandu-i sangküm February ita Namsai nung Sabha convention akaba mapang sangdongtsü akok. Maneni iba literary lokti ajanga Arunachal nung iba sentong akatsü asoshi mepishiba sülen Khandu-i iba convention takok ngudaktsütsü asoshi takokba tashi teyari agütsütsü asoshi nangzük.
Asam Sahitya Sabha züngsem Arunachal semdangertem rongnung Sabha secretary Paramananda Rajbongshi aser züngsem Kanak Kumar Bora, Jadab Sarma, Hiranya Hazarika, Nabeswar Saikia, Mohan Moran, Arunjyoti Moran aser Monjit Gohain densema liasü.