Arunachal nung BJP-i Congress sasep nung mangatettep nungi pilar

Itanagar, December 21 (Agencies): Arunachal Pradesh nung tang Congress nung mepetmesü aliba dak sentakba nung tanü BJP-i, sorkar tashi nung aliba MLA tem tsüngda mangatettep aliba ajanga state yimtenren tensa anokshiba nung parnoki tai kecha inyaka mali, ta metetdaktsü.
State yimtiba, Itanagar nung aliba Arunachal Press Club nung osangbenertem den jembidang BJP state unit Tir Tai Tagak-i, “Angh-i assembly senden atema sangküm January 14 nü masü saka December 16 nü ayongba mapang party nung party anemertemi sorkar atsüngtoktsü ta meteta Congress-i state yimtenren nung tashiyim amshitsü tasa yanglubaji temetet dang,” ta ashi.
State nung Nabam Tuki’er sorkar atsüngtoktsü atema BJP-i tasa tamajung yanglur ta Congress-i BJP nem tai tongloktsüba mapang ka nung Tagak-i iba o jembiogo.
Paisa, Congress tasa dak sentakba nung party nung senior lenirtemi party anema noktaker MLA tem mulung masübatem atema meinyaker mesüra state yimtenren tensa yanglushitsü atema meinyaker, ta aitsü.
“Iba ya BJP-i aniba NDA sorkar tenüng menüktsütsü atema AICC-i tasa yangluba lir. Tawa yimtenren tensa ajanga state nüburtem majung sayuogo,” ta pai ashi.
“Party anema noktaker MLA temi November 8 nü nungi tenzüka Legislature Party (CLP) sendentem nung madener, ajisüaka ibaji kanga ajitettsüsa mesüra disciplinary action agitsüsa masü. Congress telok ana tsüngda tim masüba yimyatem state-i kuli asütsüsa akümer,” ta Tagak-i ashi.
Taoba ita Arunachal Pradesh Assembly nung voice vote agütsütepa Speaker Nabam Rebia anentsütsü bangzünga ayu aser party anema noktaker Congress MLA 20, BJP MLA 11 aser Independent MLA ana densema züngsem 33-i Chief Minister Nabam Tuki anema sign süa liasü.