Arunachal nung BJP-i PPA den lokteptsü benoker

Guwahati, June 27 (Agencies): BJP-i Arunachal Pradesh Chief Minister, Kalikho Pul-i aniba People’s Party of Arunachal (PPA) nem party den loktepdaktsüner.
Taküm March ita nung state chief minister, Nabam Tuki anema apusodang mulung masüba Congress MLA 30 shi regional party PPA den dena liasü.
Ajisüaka tangbo Centre nung BJP lenirtemi PPA ji BJP den loktepdaktsüner. Iba ya atalokra Assam nung BJP-i aniba sorkar akümba sülen BJP sorkar tashi aliba tanabuba Northeast state ji Arunachal asütsü.
Tang BJP-i temalen nungi ita asem tain Pul’er sorkar nungitdar.
BJP tongti lenir kati, “Iba dak sentakba nung Amit Shah-i June 29 nü telemtetba ka agitsü. Arunachal nung party inyakyim ya Shah-i repranger. BJP-i PPA nem tekaraba nung telemtetba agia teloktep maparen tembanga inyaker,” ta metetdaktsü.
BJP State Unit Tir, Tapir Gao-ia iba osang jangjashija, Party Tir, Amit Shah-i iba atema Pul den jembiogo, ta ashi. “Joko mapang tatsüka iba temepishiba benoka lir. Ajisüaka Assam nung assembly elections aliba aser court nung ken o benoka aliba ajanga mapang agir,” ta ashi.
Paisa, iba atema Pul-i mapang meshiogo, ta ashi.
Menden 60 aliba Arunachal assembly nung BJP MLA 11 lir aser PPA MLA 30 den independent MLA ana lir. PPA MLA karibo BJP den lokteptsü memulunger aser maneni regional party maitsü mesamanür.
PPA Chairman, Kameng Ringu-i, BJP den lokteptsü atema jembia mali. Iba ya olulu asütsü. Mapang talangka nungi PPA ya NDA züngsem ka lir. Party anapronglai longjemer inyaktsü lemtetogo, ta ashi.
Paisa, PPA ya Congress party tem den madener BJP telok, North East Democratic Alliance (NEDA) nung lir, ta ashi.
“Regional party raksatsütsü merangdangba malitsüla. Longjemer inyaktsü atema NDA aser NEDA sabanga anaji teperi. PPA ji BJP den loktepra tia maka asütsü. BJP aser PPA tsüngda mangatettep kecha malitsüla,” ta paisa ashi.