Arunachal nung BJP sorkar malitsü; onok tang tashi Cong nung lir: Cong MLAs

New Delhi, February 01 (Agencies): Arunachal Pradesh nung temulung masüba Congress MLA temi Hombar nü, Congress-i maneni sorkar tashi abentsü atema Chief Minister menden nungi agiensang, Nabam Tuki CLP nungi agientsüla, ta akhangba agütsüogo.
Temulung masüba Congress MLA 21-i, parnok tang tashi Congress den dena lir aser parnoki National party Tir, Sonia Gandhi aser tatong Tir Rahul Gandhi na anema kecha mali, saka Tuki inyakyim ajanga mulung masür, ta ashi.
Tang state yimtenren nung mepetmesü aliba atema parnoki senior party lenir, V Narayanswami nem tai tongloktsüogo.
“Onok ya Congress MLA tem lir. Onoki BJP sorkar masü saka Congress sorkar aginer. Onoki bangdak lenirtem anema mali. Tuki ji lenir menden nungi agienra ajakji süngjemtsü aser Itanagar nung Congress sorkar akümtsü,” ta MLA aser mulung masüba telok atema otongdar, Pasang Dorjee-i osangbenertem dang ashi.
Sonia Gandhi aser Rahul Gandhi na den senden amentsü atema mulung masüba MLA temi ita aika amajok nung atar, ta paisa ashi.
“Ajisüaka Congress bangdak lenirtemi onoki akhangba ataloktsüra, onoki parnok pelapela ajurutsü. Congress lenir aser state nung party affairs in-charge, Narayanswami-i tetsükdaktsü bener arutsür. Congress Tir aser tatong tir ajurutsü memelabaji pa ajanga lir,” ta paisa ashi.
Arunachal nung sorkar akümtsü atema Congress nung mulung masürtemi BJP pusemtsü asü (?), ta asüngdangba langzüdang Dorjee-i, ibaji asüngdangtsü madoker, kechiyong iba telok nungi MLA timba lir, ta ashi.
“Onok (Congress) MLA 21 lir aser BJP MLA 11 lir. Ano independent MLA-a ana lir. Congress-i aniba teloktep sorkar ka asütsü, anungji onoki mashi dang nungi teyari agitsü,” ta pai langzü.