Arunachal nung Congress züngsem aika BJP nung aden

Itanagar, May 14 (Agencies): Arunachal Pradesh nung Congress sorkari BJP sorkar melenba sülen Congress party züngsemtem den Panchayati Raj lennir aikati Bharatiya Janata Party (BJP) nung aden.
Arunachal Pradesh nung 28-Likabali Assembly constituency kübok BJP Mandal committee-i ayongba sentong ka nung Congress züngsemtem aser Panchayati Raj lennirtem BJP nung aden.
“Party tashi angang aser loktiliba asoshi bilema mapa inyakang” ta sentong nung State President aser taoba MP, Tapir Gao-i ashi.
State nung Pema Khandu aser Centre nung Narendra Modi lenisüba kübok Arunachal Pradesh tejakleni aotsü aser terenlok angutsü, ta Tapir Gao-isa metetdaktsü.
BJP nung adenertem pela agizüka o jembidag, local MLA aser Health & Family Welfare Minister, Jomde Kena-i terenlok bener arutsü nangzük.
“Party züngsem tejentemi züngsem tasentem anioktsü aser anitettsü atema tebilemtsü bena mapa inyaktsüla” ta State General Secretary, Jarpum Gamlin-ia metetdaktsü.
Sentong nung State General Secretary BR Waghe-ia Arunachal Pradesh nung mezüng BJP lennirtem nem tetushi agütsüba den parnoki inyaka toktsüba mapa tajungtem indang bilemteta jembi.
State Secretary cum West Siang District in-charge, Lelong Lingfa-ia BJP indang tangatetba, teinyaktsü aser inyakyim indang osang lemsatep.