Arunachal nung Gaon Burha 50 dak tema mapa nungi anen

Dhemaji, Luroi (August) 29 (Agencies): Arunachal Pradesh kübok tawa tasen tentetba Siang district nung Pangin aser Kebang circles nungi Gaon Burhas (GBs) 52-i mapa nungi anenba shiditem agütsüogo.
State sorkari Pangin (Perang-Lampang) nungi Boleng town-i district headquarters belentsü mapa inyakba anema GBs-i iba mapa inyaker.
Taoba mapang Arunachal sorkari Siang indang district headquarters ji Pangin town nung amenoktsü ta osang metetdaktsü saka State Cabinet-i Pangin sub-division nung alirtem den masüngdangtepi Boleng town-i district headquarters belentsü telemtetba agi.
“Sorkari sangdongba sülen Siang district headquarters belentsü telemtetba agibaji meputep, ozüngi memelar aser yimteren nung ajemdaker inyakba mapa ka lir” ta GBs-i ashir.
Taküm March 12 nü State Cabinet-i taoba telemtetba alema Boleng-i headquarters belentsü lemtetba atema mepelar, ta parnokisa metetdaktsü.
Küm asem tejaklen taoba Arunachal Chief Minister Nabam Tuki-i Pangin town nung Siang district headquarters indang lung azüngtsü. Idang nung jagi Pangin nung district level office tem amenoka mapa inyaka arur.
Pangin nung alirtemi district headquarters amenoktsü atema parnok ali tenla agütsü saka bangdakpurtemi ibaji mangateter, ta Pangin Head Gaon Burha, Tameng Messar-i ashi.
Hombarnü GB temi Siang Additional Deputy Commissioner (ADC) indang office nung parnok anenba shiditem den uniforms agütsü.
August 28, 2018 anepdang nung GB tem aser tanga telok aikati ghonda 72 Pangin area bandh ayonga agir.
Ajisüaka, Siang ADC Tarik Talom-i GB tem anenba shiditem magizük aser parnok dang iba ama lungkak aitba mapa meinyaktsü ayongzüker.
State sorkari kechi südir süaka inyaktsü ta masü anungji GB temi parnok telemtetba meyipa reprangshitsü mepishir, ta ADC-isa metetdaktsüogo.