Arunachal nung medical college tasen amenoktsü

Itanagar, July 03 (Agencies): Union Health & Family Welfare Minister, J P Nadda-i, Arunachal Pradesh nung anema alibaren jenjang tajungba akümtsü atema tang mezüng state nung medical college ka Naharlagun nung amenoktsü atema senotsü tekaraba nung agütsütsü, ta metetdaktsüogo.
Yashi Delhi nung Arunachal Pradesh Chief Minister, Kalikho Pul-i Union Minister ajurua state nung anema alibaren jenjang ajungkettsü nüngdak ta shia liasü, ta ketdangser sangdong ka ajanga ashi.
Kasa sangdong ajanga ashiba agi, Union minister-isa ano Lohit district kübok Tezu nunga medical college ka amenoktsütsü ta shiogo.
Chief minister-i, iba ya ajanga state anüdoklentsütsü anema alibaren aser medical shisaliok tajung agütsütettsü, ta ashi.
“Tezu ya anüdoklentsütsü lir, yangi medical college ka amenokba ajanga nüburtem dang masü saka armed forces aser paramilitary sepaitema teyari agitettsü aser iba den külemi ibaji rara mapang nunga amshitettsü,” ta Pul-i ashi.
Pul-isa Itanagar nung nursing college ka aser Bomdila aser Tezu na nunga nursing school kaka amenoktsü atema mepishi aser Union minister-i ibajia mulunga senotsü agütsütsü nangzük.
State nung health institutes junga aotsü atema Nadda-i sen crore 83 agütsütsü nangzük.
Minister-isa welfare scheme, Personal Independence Payment (PIP) tajangzüktem reprangshitsü nangzükogo, ta sangdong nungsa shia lir.