Arunachal nung ‘Naga’ olung agientsü merangba anema noktaker

Itanagar, Rongjui (September) 14 (Agencies): Lok Sabha MP Ninong Ering-i ‘Naga’ olung agientsü merangba arema Tirap Changlang Longding People’s Forum (TCLPF)-i jashiba metetdaktsüogo.
‘Naga’ ta asüba olung ya Arunachal Pradesh kübok Tirap, Changlang aser Longding (TCL) district tem nung alirtem dang ajar aser parnok ya Arunachal State indang scheduled tribe (ST) list kübok lir.
“Kija/telok kari yimtenren tsütsü ajangzüktsü atema ozü putiotsü, sobaliba, inyaksangshi raksatsütsü merangba onoki anema noktaker. Arunachal Pradesh nung aliba Naga nunger ajiteta ‘Naga kin mashi ka’ ta asüba olenji Tangsa Naga, Nocte Naga, Wancho Naga, Tutsa Naga aser Olio Naga ta melentsüla” ta TCLPF-i metetdaktsü.
“Küm pungu süiba sülen Ering-i kechiba iba mapa inyaker ta onoki asüngdanger. May 2013 aser June 2013 nunga pai iba onük atema mezüng mapa inyak. Iba mapang pai taoba Union Tribal Affairs Minister V Kishore Chandra S Deo den ajurutep aser ‘any Naga tribe’ ta asüba olen agientsü mepishi,” ta parnokisa ashi.
TCL district tem nungi shimtetba MLA temi iba onük ya National Commission for Scheduled Tribes aser Union Tribal Affairs Ministry dangi abentsüla ta TCLPF-isa mepishia metetdaktsü.