Arunachal nung nisung 33 dak COVID-19 putet

Chiteni/July 11, 2020 (Agencies): Arunachal Pradesh nung küm ana tanur ka densema nisung 33 dak coronavirus tashidak putetta liasü, ta Honibarnü, health department ketdangser sangdong ka ajanga metetdaktsü.
State nung tashidak tasen puteter rongnung, Capital Complex tesem nungi nisung 28, Changlang district nungi nisung asem aser Namsai nungi nisung ana densema lir.
Arunachal Pradesh nung iba wara adoker sülen nungi anogo ka tsüngda tashidak timtiba putetba rongnung iba ya tanabuba asütsü, ta State Surveillance Officer Dr L Jampa-i metetdaktsü.
July 3, 2020 nü, State nung nisung 37 dak iba tashidak puteta liasü.
Capital Complex tesem nungi tashidak tejangja puteter nisung 28 rongnung Naharlagun indang E-sector kübok apartment complex nungi nisung 14 dak iba tashidak puteta liasü.
Naharlugan indang E-sector apartment complex nung COVID-19 tashidak agi shiranger nisung mezüngbuba dak nungi arishi küm ana tanur ka densema nisung 11 shi menatepa liasü, ta Jampa-isa metetdaktsü.
Tang, Arunachal nung nisung 213 shi iba tashidak agi shirangdar, nisung 120 taneptsü nguogo aser iba tashidak mekokteti nisung ana taküm samaogo.
Tanü tashi, State nung sample 29,834 shi tendangogo.