Arunachal nung NSCN-IM anema lungkak ait

Namrup, April 3 (Agencies): Arunachal Pradesh nung telungpur teloktemi ozüng alema mapa inyakba atema Tirap district kübok Khonsa town nung alirtemi lungkak aitba sentong ka ayongzüka agi.
Tanü Khonsa market nung parnoki Nationalist Socialist Council of Nagaland – Isaak Muivah (NSCN-IM) anema lungkak aitba sentongji agi.
Tirap district kübok Kheti yimtsüng nung NSCN (IM) telungpurtemi NPP party züngsem ana dak kanga mejungi azükba sülen iba sentong ayongzüka agi.
March 29 aonung NSCN (IM) telungpur telok ka Khonsa jila ana aliba Kheti yimtsüngi ao aser parnoki posemba MLA candidate ka yaridaktsütsü atema mapa inyak.
Idangji parnoki NPP party züngsem ana- Jaley Anna aser Khammai Aboh na pur kanga mejungi züka merenshi. Iba mapang Anna idakjisa asü aser Aboh kanga mejungi yirur Dibrugarh-i anir oa anepaludar.
Tanü security forces aser district administration-i lungkak aitertem dang iba mapa tamajung inyakertem aputsü aser ochi obendang agütsütsü ta nangzük.