Arunachal nung NSCN (IM) pur tesep asem raksatsü

Kohima, Chiteni/July 03 (Agencies): Telungpur raktoktsü asoshi DAO division kübok Assam Rifles aser Army nati Motongsa yimtsüng meita aoba mapang nung NSCN (IM) pur tesep asem tashi nguteta raksatsüogo.
Motongsa yimtsüng temeket nung telungpurtemi nüburtem amokmerentsü aser rakzükraktemtsü asoshi merangba osang angazükba sülen Assam Rifles aser Army na senteper Motongsa yimtsüng nung meita aoba sentong ka sashisashia agi liasü. Meita aoba mapang nung sepaitemi NSCN (IM) pur tesep asem aser logistic base ka ta ngutet.
Item teseptem ya telungpurtemi parnok iba temeket nung inyaksangshi balala atema tamendakdak ama amshia liasü. Item teseptem raksatsüba ajanga Motongsa tesem nung dang masü saka Changlang kübok Nampong & Miao circles nung aliba tesemtem nung telungpurtemi minprongba ajema akümtsü. Taküm küm Metsüremi/March nung Miao circle nung tesemtem meita aoba mapang nung NSCN (IM) pur tesep nguteta raksatsüba sülen tang iba ya ataloker aser iba ajanga telungpurtem inyakyim mesademi kümogo. Maneni tesep bensatsüba sülen telungpur jenshir alirtem aputsü asoshi meita aoba sentong ka tenzükogo, ta Col C Konwer-i sangdong ka ajanga metetdaktsü.