Arunachal nung NSCN pur pezü apu

Itanagar, December 21 (Agencies): Arunachal nung security Forces, Longding aser Khonsa battalion nati mita aoba mapang nung NSCN(U) telungpur parnok asem aser NSCN(K) puri ka, ta December 20 nikongtsütsü puogo.
Sonari jila nung telungpurtemi nüburtem amokmerena sen rakzükrakdemtsü merangba osang tejangja ka angazükba sülen Longding battalion puri sang ka soa yutsüba nung NSCN(U) nung Self styled Private Jaichok, Self Styled Lance Corporal Panyam Wangjen aser Wangpan Wangsa nunger rakzük rakdem tesüdak nung apu.
Parnok ket nungi pistol ana den injang, opium, rakzük rakdemtsü atema shidi zülua abenba, rakzük rakdemba osang tejangja aser tanga tashshitsü kuli kakettem den mobile phone ishika apu. Parnok apuba tesem nung ashishiba mapang nung parnok ya NSCN(U) telok nungi ta parnoki nangzük aser parnok asem ya Jaichok lenisüba kübok iba tesem nung ita trok tashi rakzük rakdemba maparen balala nung shilem agiba dena nangzük.
Kasa tatalokba ka nung Khonsa jila nungi Khonsa Battalion-i NSCN(K) pur Self Styled Private Kammo Kanglom, pistol ka bener rakzük rakdema lia apu. Pa ket nung pistol den injang, opium aser rakzük rakdemtsü atema shidi zülua abenba ngutet. Pa apuba tesem nung ashishiba mapang nung pai pa NSCN(K) nung züngsem ka ta nangzük aser pai iba tesem nung rakzükrakdemba nangzük.
Defence PRO (Kohima) Col C Konwer-i ashiba agi, DAO DIVISION kübok Longding aser Khonsa battalions puri south Arunachal Pradesh nung mita aoba sentong tem kanga takok ngua inyakyonga odar, aser iba ajanga iba tesem tesünep nung toktsür aser rakzükrakdemer ket nungi nüburtem kümzüka ayur. Tang parnok pezü tashi apuba ajanga iba amala rakzükrakdemba maparen nung shilem agirtem dak tsübu ka aitdaktsütsü.