Arunachal nung NSCN (R) aser ULFA (I) telungpur 4 apu

Kohima, Rongchii (April) 09 (TYO): Tsüngluruwa mongpu tenzüktsü lia South Arunachal Pradesh nung rakzükratema sen akhangba kanga bulua kümdar, aser tesüiba hopta ishika tsüngda NSCN aser ULFA(I) telok balalai tesem nung sen akhangba mapa inyakba osang jenti lir, ta Col C Konwer PRO (Defence)-i sangdong ka ajanga metetdaktsü.
Item mapatem nokdangtsü atema Security Forces -i asalentong tajung yanglua inyakdar, ta sangdong nungsa shia lir.
Iba dak sendakba nung Dao Divison kübok Changlang battalion, Security Forces-i operation tongti ana agiogo aser iba mapang nung NSCN(R) züngsem ana aser ULFA(I) züngsem ana Rongchii (April) 09, 2018 nü apu, ta kasa sangdong ajanga metetdaktsü.
Changlang kübok Ngeichang tesem nung telungpurtem aliba osang angashiba sülen Changlang battalion-i telungpurtem mita aodang NSCN( R) nungi sergeant major Nongman Jugli aser Lance Corporal Sampan Harap na apu aser tena ket nung prangpong, injang aser tanga tashishitsü kulitem liasü, ta sangdong nungsa shia lir.
Asüngdangyaba mapang nung tenati NSCN(R) den densema aliba aser Major kübok iba tesem nung sen akhangba maparen nung densema lir a nangzük, ta sangdong nung shia lir.
Ano Lekhapani area nunga Battalion-i Anil Kanikar @ Dahotia aser Pramod Barua na apu, aser tenaprong ya ULFA(I) nungi lir. Asüngdangyaba mapang nung tenati nokdanga aliba telok nung dena aliba aser sen akhangba nung shilem agiba nangzükogo, ta kasa sangdong ajanga metetdaktsü.