Arunachal nung osangbener ka dak azükba ken o nung nisung pezü apu

Itanagar, July 11 (Agencies): July 7 nü Arunachal Times nung associate editor, Ranjit Sinha dak azükba ken o nung police-i sorkar ketdangser ana densema parnok 4 puogo
Aitsüa alir pa pezü ya IG Park/Forest colony, Itanagar nung alir Tago nungi Joram Tadam, Joram nungi Tanya Raja, Yarda nungi Yarda Sanjoy aser Gokia Nehru ta jangajaogo aser parnok Hombar o Mongolbarnü na tsüngda apu.
Par pezü rongnung Sanjoy ya IRBn constable ka lir, shiba sports quota nung shimoka liasü aser pa tang Balijan nung posting süa lir. Kasa mapang nung Gokia Nehru ya Itanagar traffic warden lir.
Police temi kanga dang mapa tajung inyaka iba ken o ya ghonda 72 nung bushidangteta ogo. Iba ken o bushisüngdangba police telok nung SP Capital Dr A-i anir SDPO Techi Hanyir, Officer in Charge, Itanagar Police station T Bage, Inspector R K Jha aser investigating officer A K Singh dena lir.
Police temi ashiba agi par pezü ya judicial custody-i yoktsü aser parnok anema ‘IPC non bail-able sections’ kübok x ken o benoka lir.
Police temi parnok ket nnungi mobile phone aser tanga kuli kakettem dena ngutetogo.
Arunachal Times nung associate editor Ranjit Sinha ya July 7 nü kidangi mepa oya aliba mapang par pezü yagi azük.
Arunachal Press Club (APC), Arunachal Pradesh Union of Working Journalist (APWUJ) aser Arunachal Electronic Media Association (AEMA)-i iba ken o tekaritiba nung bushuteta aibelena alirtem apuba atema Capital Complex Police tenüng asang.
Külem sangdong ka nung iba lokti asem yagi, capital police-i iba ken o kanga karakara tembanga inyaktetba atema parnok tenüng asangtsü tetemsü ta metetdaktsü. Ajisüaka abelena alirtem nem temerenshi tesashi agütsütsü asoshi police mapa tang ang tenzüker, ta iba sangdong nungsa shia lir.
“Iba amala ozüng alema inyakba maparen nungi melamela jenbua maotsü asoshi police temi aibelena alirtem atema ozüng tesashi ka yanglutsüla. Onoki IRBn jawan aser Itanagar Traffic Warden na mapa nungi tangsa anetsütsü asoshi akhanger. Police temi nüburtem nem tekümzükba agütsütsü melena iba amala maparen inyakra nüburtem koda asütsü?”ta parnoki ashi.
Media organization yagi maneni police department dang par department nung aliba sepaitem dak tenük yoka reprangtsüla, ta ashi.
Maneni par pezü ya tang ozüng alema maparen balala inyakertem asoshi tansütsü süa temerenshi tapet agütsütsü asoshi APC, APUWJ aser AEMA puri akhang. Paronki maneni shingaia iba ken o nung meinprong masütsü asoshi mepishi.