Arunachal nung parliamentary secretary anentsür

Itanagar, Luroi (August) 15 (Agencies): Arunachal Pradesh Governor Brig (Retd) Dr B D Mishra-i yashi tetuyuba ka agütsüba sülen Arunachal nung parliamentary secretary 23 pronglai menden nungi anentsüogo.
“Arunachal Pradesh Legislative Assembly nung züngsem 23 parliamentary secretary menden nungi anentsür” ta Governor-i tetuyuba agütsü. Iba ya Itanagar Gauhati High Court nung Permanent Bench-i tuyuba sülen anidakba lir, ta Chief Secretary Satya Gopal-i ashi.
“Okadaki iba oshidang agütsüba anogo nungi tenzüka iba tetuyuba ya mapa küma inyaktsü” ta Gopal-i ashi.
Justice Monojit Bhuyan aser Justice Rumi Kumari Phukon na adenba high court bench-i PIL ka angadangdang iba obendang agütsü. PIL ji Kyoda Ram-i benokba liasü aser 2017 küm Supreme Court-i obendang agütsüba nung ajemdaker high court-ia kasa obendang agütsü.
High court-i Arunachal Pradesh Parliamentary Secretaries (Appointment, Salaries, Allowances and Miscellaneous Provisions) Act 2007 ji ozüngi memelar ta oshidang agütsü.
“Supreme Court-i telemtetba agiba nung ashishitep kecha mali ta telok ajaki mulunga agizük” ta obendangertemi ashi.