Arunachal nung Pema Khandu’er sorkar atema tayongzükba ka ajurur

Itanagar, July 24 (Agencies): Arunachal Pradesh nung chief minister inyaktsü tenangzükba agiba sülen hopta ka lir, arishi küm 37 tain, Pema Khandu atema tang mezüngbuba yimtenren nung tayongzükba ka ajuruogo, aser ibaji pa tasodak Tawang nung tzünokdang anema lungkak aitertemi takhangba agütsüba lir.
Hokolbarnü Tawang nung lungkak aiter nisung noklang aika adenshi aser taküm May 2 nü police-i kahsetba kibong shia nem sorkar mapa agüjang, ta takhangba agütsü.
Tzünokdang anema activist Lama Lobsung Gyatso apuba sülen nisungtemi lungkak aitdang police-i nisung 2 kahset aser 18 yirutsü.
Tawang monastery nung tamangba lennir indang senso ashishiba ajanga Gyatso-i lisopurtem temulung yirutsü ta tai tonglokja police-i pa apu. Tawang monastery ya India nung Buddhist nunger atema kanga dang tongtibang monastery ka lir.
Ajisüaka, Gyatso pusemertemi ashiba agi, pai Save Mon Region Forum (SMRF) kübok Hydel power projects anema mapa inyakba atema apu.
Arunachal Pradesh kübok Mon region nung Tawang aser West Kameng na densema lir aser iba tesem ana nung taoba küm ishika tsüngda hydel power projects 13 tashi lapokogo.
“2007 küm nungi project tenzükba sülen nübortemi anema noktaker” ta Save Mon Region Forum secretary, Lobsung Chhoedup-i ashi.
Tang lungkak aitertemi Pema Khandu’er sorkar dang police-i nisung kahsetba tatalokbaji CBI nem bushisüngdang südakjang ta akhanger.
BJP-i Tawang nung lungkak aitertem pusema nungiter aser ibaji Pema Khandu atema tayongzükba tuluka lir.
Taoba hopta Pema Khandu-i BJP-i yariba Arunachal sorkar toktsür Congress sorkar ka tentet.
“Nübortem taginüba atema teti BJP-i pusema nungiter. Tesüiba mapanga onoki ibaji inyaka aru aser maneini inyaktsü” ta BJP otongdar Lham Dorjee-i metetdaktsü.