Arunachal nung police-i nisung 2 kahset

Itanagar, May 02 (Agencies): Hombarnü Arunachal Pradesh, Tawang district nung tzünoktang yangluba anema noktakba züngsemtemi monk ka chioktsü atema takangba agüja police station raksatsütsü merangdang police-i tajemba agi longkak aiter ana tepsetogo, ta ketdangsertemi ashi.
Arrtsülen aliba district nung hydro power projects yanglutsü anema noktaker longkak aitertem jagi par telok lenir monk, Lama Lobsang Gyatso chioktsü atema takhangba agüja police station telungi aitsü merang, ta IGP Nabin Payeng-i ashi.
“Iba tensa azüoktsü atema Tawang jila nung army temi mitdar, iba den külemi district nung Section 144 CrPC benoka lir,” ta Payeng-i ashi.
Ajisüaka tanga osang ajanga ashiba agibo, police-i injang yokdangji tetsür ka densema nisung asem asü.
Lama Lobsang-i Mon tesem nung tamang lenir tongti, Tawang Monastery Guru, Tulku Rinpoche tenüng menüktsüba ken o nung pa April 28 nü apu.
Audio clip nung Lobsang-i, Monastery Abbot (Tulku)-i tesem nung alirtem atema ajungtsü atema bilema melira pai Tawang hydro power politics nung majemoktsüla ta jembia lir.
Sorkar osang ka ajanga ashiba agi, Minister of State for Home Kiren Rijiju-i DC, district SP aser Chief Minister Kalikho Pul nunger den iba tensa indang metetpelaogo.
Iba mapang nung Minister-i, district nung tensa süngjmtsü atema lokti balala nungi züngsemtemi yimjung committee ka tentettsüla, ta benok.