Arunachal nung police-i shinga mekhaset: Home Minister

Itanagar, February 27 (Agencies): Sorkari non-Arunachal Pradesh Scheduled Tribe (APSTs) 6 nem permanent residence agütsütsü tebilemba anema Arunachal Pradesh nung tensa mejungi akümba atema Home Minister Kumar Waii-i mepelaba metetdaktsü.
Lungkak aitba mapang police-i nisung asem khaset ta asüba osangji tiyazü, ta Waii-isa ashi.
Itanagar nung ITBP aser CRPF indang company talila mapa lemzüktsübaji pai kecha memetet ta Home Minister-isa ashi aser iba ajanga Arunachal nung Pema Khandu-i aniba sorkar sasep nung mepetmesü adoka lir ta nisungtemi jembitsü tenzükogo.
“Lanur asem asüba osang angashia ni kanga aoksar, saka parnok shinga police injang agi khasetba masü. Ni DGP SBK Singh aser SP (Itanagar) M Harsh Vardhan na dang ozüng alema inyakertem aputsü atema tetuyuba agütsüogo” ta Waii-i osangbener dang ashi.
BJP sorkari non-Arunachalee kin 6 nem permanent resident certificate (PRC) agütsütsü bilemer ta osang sangoktsüba sülen taoba Honibar nungi Itanagar aser Naharlagun nung nisungtemi lungkak ait tenzük.
Iba ajanga ketdangsertemi curfew ozüng agütsü aser internet services noktang.
Anogo asemnü tashi lungkak aityonga aruba sülen Chief Minister Pema Khandu-i Hombarnü sorkari PRC maparen meinyaktsü ta sangoktsüba sülen ang tensa süngjema aküm.
Mongulbar anepdang nungi curfew agienogo saka internet services maneni noktanga lir, ta ketdangser kati ashi.
Nübortemi police den amalitepa yariteptsüla. Iba tatalokba ya telok mesüra kin ka dak dang tai tongloktsütsü makok, ta Home Minister Waii-i metetdaktsü.
Chief Minister Pema Khandu-i peace committee ka tentettsü lemtetba atema osangbenertemi asüngdangdang, Waii-i ‘kodang mapa lemzüktsüdir, ni inyaktsü’ ta langzü.
Pai Chief Minister dang cabinet senden ayonga amentsü atema osangtem yok saka pa dang official süa senden amenba osang memetetdaktsü, ta Home Minister-isa shisem.