Arunachal nung PR agütsüba anema Tukii ken o tasen ka benok

New Delhi, January 28 (Agencies): Arunachal Pradesh nung Center sorkari President’s Rule agütsüba anema taoba Arunachal Pradesh Chief Minister Nabam Tuki-i tanü Breshostibar nü Supreme Court nung ken o tasen ka benokogo.
Iba ken o ji Hombar nü nisung pongoi akümba obendangdak kasa onük nung Arunachal assembly nung Congress telok Chief Whip, Rajesh Tachoi agütsüba ken o den külemi angadangtsüa akok. Obendanger pongo rongnung tekolakbaji Justice J S Khehar lir.
Okadak center tenüng nung jembir, Attorney General Mukul Rohatgi-i tang tashi nung Arunchal nung President’s Rule agütsüba anemabo ken o kecha agüja mali, kechiyong tang okadak agüja aliba ken o ya agütsür külenang PR bo agütsü ta metetdaktsüba sülen tanü agütsüba ken o tasen kaji benoktsüsa aküm ta angazüker.
Yashi Arunachal Pradesh nung President’s Rule agütsüba maparen nung Supreme court-i kanga süokia ia repranga liasü aser Arunachal Governor Jyoti Prasad Rajkhowa dang PR agütsütsüsa akümba kulitemji meshia liasü. ” Iba ken o ya kanga tulu, süoki ia bilemtsüla,” ta paisa ashi.
Arunachal Pradesh angh aser Home Affairs Ministry nungi okadak telangzüba Hokolbar nü agütsütsü aser idangji ken o agütsürtema parnoki agüja aliba ken o nung enoksemtsü aser melenshitsü akoktsü.
Arunachal Pradesh nung PR agütsüba atema angh dang aser Home Affairs ministry nungi kuli meshia lira ser iba shidiji mabangber agütsütsüla.
“President’s Rule agütsüba kuli mangu tashi onoki ken o süoka jembia moutettsü. PR agütsüba kuliji kasa mesüra ibajibo khenyongi asaya tapu balaka asütsü ta obendangertemisa ashi. Iba obendangdak amener obendangertemji justices- Dipak Misra, M B Lokur, P C Ghose aser N V Ramana nungertem liasü.
PR agütsüba kuliji telok ajaki mangu tashibo ken atema asüyonga obendangdak nungi telemtetba ozüng kecha magütsütettsü ta paisa ashi.
“Telok ajak nungi ken o mangadang tashibo onoki kecha telemtetba magütsütsü, kechiyong ibai ken o tasak ka lir,” ta paisa ashi.
Arunachal Pradesh nung PR agütsüba kuliji yimjak nungbo memetetdaktsütsüla ta angh-i mepishiba anema ken o agütsür okatsürtem rongnung Fali S Nariman, Kapil Sibal, Rajeev Dhawan aser Vivek Tankha nungertem lir. Obendangdak obendanger pongo dak tali amenba okadak ajanga iba ken o nung obendangdak agüja lir, ta parnoki metetdaja lir.
Arunachal Pradesh nung Congress chief minister Nabam Tukii aniba sorkar nung ita piyong mangatettepi adoka aliba ken o jembia arur, tang obendangdak par pongi iba ken o repranga Angh nem agüja aliba tashi indang asüngdangtsü tenzükogo.
Tamalen Nabam Rebia-i okadak agüja aliba ken o nung sorkar dang masüngdangtepi angh-i tatar senden ayongzükba anema shia lir. Pa ya Speaker menden nungi parnok kasa Congress telok nungi kar BJP MLA-tem den longjemer pa menden nung anendaktsü aser parnoki tatar sendenji assembly nung masü saka December 16 nü Itanagar nung nübortem adenshidak ki ka nung amen.
Ano, okadak ken o agütsürtemi angh-i state nung tatar senden January 14, 2016 nü agitsü lateta liakasa December 16, 2015 nü agitsü asoshi anghi pasasa anogo atsür alu ta aija lir.
Arunachal Pradesh tatar senden nung tatar ajak agi 60 aser item rongnungi Congress MLA 47 liasü saka parnok rongnungi tatar 21 den BJP MLA 11 longjemer Chief minister Nabam Tuki anema apuso. Iba jagi anema apusor 21 rongnungi MLA 14 disqualify sütsü.
Iba ama mapang ka nung angh-i tatar senden January nung alitsü lateta aliba nungi December 16 nü alitsü jatep aser Deputy Speaker-i Congress MLA 14 disqualify süja alibaji agientsü aser Speaker Rebia menden nungi agien. Iba senden ya Itanagar nung lokti sendenba tesem ka nung mena liasü.