Arunachal nung PR agütsütsü ni kodanga mashi: Rajkhowa

Itanagar, September 13 (Agencies): Arunachal Pradesh nung angh inyaka alisang, JP Rajkhowai pa angh menden nungi aludaktsüba sülen anogo ka lir külen osang ka jungkai adoka metetdaktsüba agi, taküm January ita nung pai kodanga Arunachal Pradesh nung President’s Rule agüjang ta mashi.
Pai nübortem den tepila o jembidang, Arunachal nung President’s Rule agütsübaji Prime minister menden ser aliba Union cabinet senden nung linük temzüng arla 356 nung ajemdaker parnoki renem, ta metetdaktsü.
“Arunachal nung PR agütsüba ya angh-i agütsüba osang kija nung ajemdaker masü saka Prime minister menden ser cabinet senden mena yangji ken o tatsü talang ajak shisadanga jembir külenang tir dang PR agütsütsü junger ta yokba agi tiri PR agütsü,” ta Rajkhowaisa ashi.
“Ni nübortem mulungba anema inyak ta nisung kari ni aija jembibaji tai, kechiyong ni kodanga Arunachal nung January 26 nü PR yoktsüla ta mashi, ni ibaji jangjashitsüner,” ta paisa metetdaktsü.
“Taküm 2016 küm Republic Day nung Arunachal nungbo PR arutsüsa akümba tensa tia aser aji February 19, 2016 nü tiri agienba indang ni kecha meshiner, kechiyong item ken o ajakji Supreme Court nung obendanger pongoi repranger obendang agütsütsüba lir ta taoba Arunachal angh-isa metetdaktsü.
Pai pa metena ashiba o ka nung, taoba mapang nungbo iba ama ken o nung obendang agütsüdang Supreme Court-i governor nem tapet temerenshi agütsütsüla ta obendang agüja aru saka Arunachal dak aketba ken o nung yabo Supreme Court-i angh anema ken o kecha magütsü.
India tir, Pranab Mukherjee-i tan Hombar nü to Rajkhowa dang Arunachal Pradesh angh menden toktsütsü metetdaktsü aser pa mapaji Meghalaya angh V. Shanmuganathan-i repsema bena atatsü metetdakja liasü.
Iba sülen Shanmuganathan  tanü Itanagar arua tongogo aser Bodbar nü nungi mapa tenzüktsü. Tanü pa arudang, State Rural Development & Panchayat Raj Minister Tanga Byaling, Chief Secretary, Shakuntala Gamlin aser ketdangpur taintemi Naharlagun helipad nung agizüka liasü.