Arunachal nung PR atema shisa agütsürji shirnok: Shatrughan Sinha

New Delhi, January 30 (Agencies): Centre sorkari Arunachal nung President’s Rule benoktsü atema telemtetba agiba atema aija tanü BJP MP, Shatrughan Sinha-i,  Ato kilonser Narendra Modi nem shisa agütsürtemji shirnok, ta asüngdang.
Onük aika nung BJP  tongti lenirtem anema ola adoksang Sinha-i, iba ken o ya Supreme Court-i angadanger süra kechiba aritepa Arunachal nung President’s Rule benok, ta asüngdang.
Arunachal nung PR benoktsü telemtetba agiba atema Centre-i Supreme Court dang parnok temeten o ashiba sülen anogo ka lir Sinha-i twitter ajanga, “Ni asen Ato kilonser dak tamang kanga akar.  Ajisüaka Arunachal Pradesh nung President’s Rule benoktsü atema Ato kilonser nem shisa agütsürtemji shirnok’ar ta ni shisadanger. Iba ken o Supreme Court nung obendanger 5-i akümba constitutional bench kati angadangba mapang ka nung iba ya benokogo. Kechiba aritepa benok, ta ni süngmanger,” ta ashi.
“Tsüngremi tai tokang, iba telemtetbaji ajanga asenok temeten mengura asenoki akhümtsübua aliba asen Ato kilonser nem kechi telangzüba agütsütsü, ta ni shisadanger,” ta paisa ashi.
“Narendra Modi ya tebilemba tajung aliba  Ato kilonser ka lir. Khenkhenbo shisa agütsürtemi tangatetba shisa tai agütsüba ajanga yimtenren nung mera tai agir, aser ibaji party aser sorkar atema majung akümer,” ta Sinha-isa ashi.
Arunachal nung PR benoktsü telemtetba agiba atema Centre-i Hokolbarnü Supreme Court nung temeten kulitem affidavit ka nung agütsüogo.
Affidavit nungji Centre-i,  state nung tzüzüng ozüng raksaogo aser Angh o par kibongi anogoshia lendong tulu tensa ajurur, ta zülua lir.
Union Cabinet-i Arunachal Pradesh nung Central Rule benoktsü telemtetba agibaji tan hopta tetenzüklen Tir Pranab Mukherjee-i agizüka liasü.