Arunachal nung ‘Railway Line’ tasen 8 amenloktsü

Itanagar, April 19 (Agencies): Tawang, Aalo aser Pasighat-Roing-Tezu densema train lenmang tasen 8 yanglutsütsü asoshi Centre sorkari temelaba agütsüba asoshi Arunachal Pradesh Chief Minister, Pema Khandu-i pelashishia agizükba osang ka sangdongogo.
Chief Minister-i state nung train lenmang tasen amenloktsü asoshi asüngdangba ama Itakhola-Seijosa (18 km), Doomdooma-Namsai-Wakro (96 km), Dangri-Roing (60 km) Naharkatia-Deomali (20 km), Lekhapani-Nampong-New Khamlang-Deben (75 km) aser Tinsukia-Pasighat-Kanubari (300 km) lenmangtem yanglutsü atema Ministry of Railway ajanga sanction süogo.
Northeast Frontier Railway (Construction) indang General Manager, HK Jaggi den ketdangsertemi Khandu ya Bodhbarnü pa indang office nung ajuruba mapang, “Bongmang ka asangsang akümba amai iba sentong tenzüktsü,” ta Chief Minister-i ashi.
“Railway Ministry ajanga iba ama telemtet agiba asoshi kanga pelar. Onoki asüngdangba ama Centre-i taochi tulu sayuogo aser Ato Kelonser, Narendra Modi-i iba train lenmang arrtsülen aliba district, Tawang tashi yanglua aotsü asoshi molungtetba ya temolung tulu mapa lir,” ta WDR Minister, Kamlung Mossang densema aliba senden ka nung Pema Khandu-i ashi.
Item train lenmangtem yanglutsü asoshi tang ‘survey’ agiba mapang reprangshiyimtsü asütsü asoshi Chief Engineer (Survey) tajung ka yoktsü atema Chief Minister-i railway ketdangsertem dang mepeshia ashi aser pai ashiba ama yoktsü asoshi railway ketdangsertemi molungsoa agizükogo.
Railway lenmang asem rongnung Bhalukpong-Tenga-Tawang lenmang ya tongtipangtiba lir aser iba lenmang yangluba nung sen crore 40,000 junga indoktsü. Iba lenmang nung ya apu 21 aser longpok kilometre 145 atutsü lir.
Dirang aser Tawang tsüngta longpok kilometre 29 atutsü asoshi Indiang Railway ajanga sentong yangluba mapang ka lir aser iba lenmang renemba ajanga tang jejaba lenmang kilometre 285 nungi kilometre 166 dang akümtsü, ta Railway osang ka nung ashi.
Pasighat-Tezu-Parashuram Kund-Rupai lenmang yanglutsü asoshi survey agiba ya tekeraba nung atemtsü, kechiyong iba tesemtem ya lenden dang lir aser tenem mali, ta kasa osang ajangasa metetdaktsü.