Arunachal nung samaba helicopter maneni bushir

Itanagar, August 05 (Agencies): Mongolbar nü Arunachal Pradesh nung Tirap Deputy Commissioner, Kamlesh Joshi densema nisung asem mener aliba helicopter ka samaba sülen tanü agi anogo ananübuba maneni bushidagi.
District ketdangsertemi ashiba agi, Bodhbar anepdang nungi Tirap district, Deomali anasa aliba arem nung army, Assam Rifles aser police-i Mongolbar anüngdang 11:00 ako meta samaba Pawan Hans helicopter ji bushi tenzükogo. Iba dak alia Indian Air Force indang helicopter temia anünglen nungi iba tayimtsü bushi tenzükogo.
Helicopter nungji Joshi den pilot ana mener Tirap dictrict, Khonsa nungi Longding district-i apusoa liasü.
Ketdangsertemi ashiba agi, tsüngsang mopung majungba ajanga tayimtsü bushiba maparen nung tetsükdaktsü alua liasü.
Deomali nung yimtaklirtemi 11:00 ako meta langka apokba angashi ta shiogo, ta ketdangser kati ashi.
2011 küm nunga Pawan Hans helicopter ka tsüokba lendong nung iba mapang Arunachal Pradesh chief minister Dorjee Khandu den nisung pezü asü, iba sülen anogo ishika tsüngda ano Tawang nung helicopter ka anenba mapang tsükoka nisung 16 tashi asü.
Pawan Hans Helicopter Services Limited (PHHL) ajanga Arunachal Pradesh, Sikkim, Meghalaya, Nagaland aser Tripura nung service agütsür aser anogoshia Guwahati nungi Tawang tashi helicopter service agütsüdagi.