Arunachal nung samaba helicopter nguogo

New Delhi, August 10 (Agencies): August 04, 2015 nü Arunachal nung samaba Pawan Hans helicopter shilem ka tanü Arunachal Pradesh kübok Tirap district nung nguogo.
Tanü New Delhi nung osangbenertem den jembidang Arunachal state nungi Minister of State for Home, Kiren Rijiju-i, “Tirap district headquarters, Khonsa anüolentip tsütsülen kilometer 12 pila orr anguba tayimtsü teraksaji samar aliba helicopter indang lir ta Air Force-i jangjaogo,” ta metetdaktsü.
Union Minister-isa, tayimtsü teraksa anguba tesem nungji Air Force helicopter ajanga maneni bushidagi, ta ashi.
Ajisüaka helicopter nungji mena alir IAS ketdangser Kamalesh Joshi densema nisung asem tiajibo memetet.
Iba helicopter samaba sülen Army aser Indian Air Force meyong M-17, A1-30 aser Chetak ka densema helicopter pongu amshia anünglen nungi helicopter ji bushiogo, iba den Army, IRB, state police aser nüburtemi ali nung tayimtsüji bushia liasü.
August 4 anepdang 10:45 ako meta state meyong Pawan Hans helicopter nungji Tirap DC, Kamlesh Joshi den pilot ana- Captain M S Brar aser Captain Rajeev Hoskote nunger mener Khonsa nungi apusoa liasü.