Arunachal nung school kaketshir 2 anenset

Itanagar, July 12 (Agencies): Arunachal Pradesh nung tzünglu kanga aruba ajanga anentsüh lendong ka atalokdang tetsür kaketshir ana anenset aser asem yirua lir.
Tawang district kübok Namtsering nung iba lendong atalok.
Iba lendong ya government residential upper primary school indang hostel ka nung atalok. Yashinep 3:15 meta tetsürtem mejanga lia anentsüh agi hostel jara chirepdaktsür tetsür ana anenset.
Iba mapang hostel nung tetsür kaketshir 19 mejanga liasü. Warden, teaching staff aser anameta aliba yimtsüng nungi yimdaklirtemi tanga kaketshirtem kümzük.
Taoba anogo ana asemka Arunachal Pradesh nung tzünglu kanga aruba ajanga anentsüh lendong aika atalokogo.
Ano, Pare ayong nung tzü mesemi ayiemer aser iba ajanga tzüküm anatsülen alirtem pei talidak toktsür tangaleni aort, ta Doimukh nungi osang ka ajanga ashi.
West Kameng district kübok Bhalukpong-Charduar-Tawang road tanü agi anogo trokbuba shibanga lir. Iba lenmang nung tesem aika nung anentsüh alua aliba agi shibanga lir.