Arunachal nung telungpurtem anema mapa inyaker

Dimapur, June 3 (TYO): Arunachal Pradesh kübok Tirap aser Changlang district tem nung telungpurtem arem nungi meindoktsü atema Army aser Assam Rifles den police aser civil administration yaritepa mapa inyaka arudar.
Iba mapa nung nübortemi kanga dang molungsoa yaritepa arur aser taoba hopta ka tsüngda temolung malemer nisung 11 tashi pur police ket nung agütsüogo. Iba mapang prangpong-injang ayuba tesem kar bushitetogo aser bushisüngdang südar, ta PRO (DEF) Col C Konwer-i ashi.
Arunachal nung civil society-i Aboh tepsetba aitsüogo aser Tirap, Changlang, Longding Baptist Christian Fellowship (TCLBCF)-i CBI nem Tirap nung atalokba lendong bushisüngdangtsü takhangba agütsüogo, ta Col C Konwer-isa ashi.
Parnoki yashi Tirap district kübok Lazu, Khonsa aser Deomali, aser Changlang district kübok Kharsang nung nisung tepsetba anema sentongtem ayonga agiogo.
ACS-isa Centre dang NSCN (IM) den ‘ceasefire agreement’ meyipa agitsü atema ayongzükogo. Nübortemi Khonsa nung NSCN(IM) anema sentong ka nung aden, ta PRO (DEF)-isa metetdaktsü.
Army ketdangsertemi State sorkar ketdangsertem den osang agitepdar aser mapa maneni inyakdar, ta paisa shisem.