Arunachal nung telungpurtemi amakdang AR 2 tepset; 8 yiru

Guwahati, December 03 (Agencies): Honibarnü Arunachal Pradesh, Tirap district nung NSCN-K telok südi ta temulung melemi bilemba telungpurtemi Assam Rifles convoy ka mendanger amakdang Junior Commissioned Officer (JCO) ka densema sepai ana kahset aser sepai ti yirutsüogo.
Defense osang ajanga ashiba agi, Honibar nikongdang 2:00 ako meta Nginu yim anasa telungpurtemi sepai amak; Iba tesemji India-Myanmar arrtsü nungi talangkabo mepila.
“Yashi (Hokolbar) 16 Assam Rifles column ka patrolling ao. Tanü parnok meyipa arudang telungpurtemi automatic prangpong amshia injang sashia kahloktsü. JCO ka densema sepai ana tepset aser ti yiru. Yirua alir rongnung sepai anabo kanga mejungi lir. Yirua alir ajakji tayimtsü ajanga Assam nung aliba military hospital kati anir ao,” ta parnokisa ashi.
Assam Rifles temi, iba amakba sentongji NSCN-K nung “Brig” Peyong-i yanglu südi ta temulung melemi bilemer.
Tan amakba densemabo taoba hopta ana tsüngda Northeast nung telungpurtemi sepaitem asembenbuba amaker lir.