Arunachal nung terenlok alitsü asoshi nüburtem longjema alitsüla: Rijiju

Itanagar, February 21 (Agencies): Arunachal Pradesh nung aliba nüburtem dang tamangba yimsü nung politics mesayatsü asoshi, Union Minister of State for Home, Kiren Rijiju-i ajungshi.
“Asenoki tamangba yimsü ajanga state nung telemsa adoktaktsütsü merangra, Arunachal renloktsü asoshi nükla ayuba ajunga samatsü,” ta Minister-i Indira Gandhi Park nung 31 buba Statehood Day benjongmung sentong nung jembidang ashi.
“Tamangba yimsü ajanga telemsa adoktaktsütsü asoshi tashi balala amshir. Anungji asenoki item inyakyim jungjunga mita alitsüla,” ta pai ashi.
Arunachal lisa majungba ajanga Centre-i terenlok agütsütsü asoshi sentong balala renemdar, ta paisa ashi.
Tirap, Changlang aser Longding nung telungpur aliba tebilemtsü indang onük jembidang, “Tezülen nungi state nung yimjung raksatsütsü meranger, aser lanurtem temai adoka yimjung nung alitsüla,” ta pai ashi.
Yimjung melira terenlok mapa inyaktsü tamakoktsü aser telungpuri inyakba mapa kecha nunga Centre-i tatok magütsütsü, ta Minister-i ajang ajanga metetdaktsü.
Chief Minister, Pema Khandu-i state anitsü asoshi lenmang tasen yanglua lir, aser iba mapa takok angutsü asoshi nüburtemi sorkar den teka amtepa yariteptsüla, ta Rijiju-i ayongzük.
“Asenoki longkak aita sorkar nem khuret tali agütsüra, terenlok alitsü tamakoktsü. Nia state asoshi kü tashi yari, nüburtem den angatetteba, centre nem asen nübur ola angashidaktsütsü merangtsü. Aser centre nungi aruba scheme ajunga shitak inyaktsüla,” ta paisa shisem.