Arunachal nung Tibet nungeri ST tajangzüktem meshir

Itanagar, Sept. 01 (Agencies): Arunachal Pradesh nung jenoka aliba Tibet nunger bendanger aikati tiyazü nung scheduled tribe (ST) maongkatem meshir ta aija melungtet telok, Arunachal Civil Society (ACS)-i state sorkar dang parnok indang  ST certificates ji agienang, ta shiogo.
Arunachal aser China na arrtsülen mangatettep arrtsü talangka lir aser par linüki ibaji Southern Tibet lir ta ashir.
Mongolbarnü Chief Minister, Pema Khandu dangi züluba temepishiba shidi ka nung ACS-i, “Tibet nungertemi shishilembartem ama sayua state telungi aiter. Lisopur- Monpas, Sherpas mesüra Sherdukpens den Tibet nunger bendangertem ji bendangtsü saksaker, kechiyong telok ajakji tamangba yimsü aser tereprangtsü kasa,” ta ashi.
“Jenoka aliba Tibet nunger tebilemtsü onük ya reprangshitsü atema state sorkari tangsa mongin committee ka tentettsüla,” ta parnokisa ashi.
ACS-isa,  Arunachal nung alir tribe ajak jangjatsü atema state sorkari mera agia inyaktsüla aser Temzüng o State of Arunachal Pradesh Act, 1986 nung amshiba ‘Any Naga Tribe’ ya agientsüla, ta takhangba agütsü.
“State jenjang anguba sülen küm 30 nunga tribe tenüngtem aser tribe kwi ali’ar ano junga mejangja. Arunachal Pradesh Act, 1986 nung state nung tribe 12 aliba dang shia lir. Talisa Tangsa, Nocte, Wanchoos aser Tutsa tribe tembo ‘Any Naga Tribe’ kübok ka dang küma lir,” ta ACS-i ashi.