Arunachal nung tzümetsüng ajanga timtemer

Itanagar, September 2 (Agencies) : Bodbar tashi Arunachal Pradesh kübok district aika nung tzümetsüng timtem kasa dang lir aser ketdangsertemi item tesemtem nung maneni yaritepdar.
Yashi Chief Secretary Ramesh Negi-i senden ka jazüka agidang deputy commissioner tem dang nüngdakba public services tenzüktsü aser nisung taküm den kiojentem kümzüka ayutsü atema mapa inyaktsü tetuyuba agütsü.
PWD, RWD, BRO aser MoRTH amala gari lenmang anepalurtem dang jeretpera alitsü aser raksarakbongtem tekaratiba nung yanglutsü tetuyuba agütsüogo, ta sorkar sangdong ka ajanga metetdaktsü.
Namsai district kübok yimtsüng 60 den tima tzü agi metsüngbangogo aser Jenglai, Kaba o New Silatoo nung lapoka aliba relief camp tem nung kibong 117 nungi nisung 600 shi jenoka lir, ta Namsai Deputy Commissioner, R K Sharma-i ashi.