Arunachal nung tzümetsüng tensa mesüka kümogo

Itanagar, August 31 (Agencies): Arunachal Pradesh nung ananü tashi tzünglu maneni aruba ajanga tzümetsüng tensa ka mesüka kümogo. District aika nung anentsüh aluogo aser nisung aika talidak makai kümogo.
Lohit, East Siang, Tawang aser Lower Dibang tesemtem balaka iba tensa yagi kanga mejungi kongshiogo, ta ketdangsertem sangdong ka ajanga ashi.
China arrtsülen aliba Tawang district nungi osang ka ajanga ashiba agi, tzünglu maneni aruba ajanga tesem tenet tashi nung anentsüh tulu aluogo aser ibaji ajanga kiojen aser rongsen jenti laluogo.
Anentsüh lendong nung nisung ana yirua liasü aser tenaprong tang Lumla Primary Health Centre nung yaridar, ta osang ajanga ashi.
Kudung aser Thongleng yimtsüng nungbo anentsüh oktokdagi, ta BRO osang ka ajanga metetdaktsüogo.
Deputy Commissioner, Duly Kamduk-i, Lumla, anentsüh ajanga nokdangba ajanga Zemithang aser Dudunghar tesemtem den osang magiteter anungji department ajaki lendong atalokba osang asadanga bendener tekaratiba nung office tongjang, ta metetdaktsüogo.
Tzümetsüng mesükba tensaji Lohit district nung balaka atalok aser anogo asem tsüngda Tezu o Sunpura telungtet nung aliba ayongtem akhi dang nung tzü tali kümogo, ta osang ajangasa ashi.
MLA Mohesh Chai den SDO G Hazarika, department balala nung ketdangsertem, police aser rescue team tem lendong atalokli tesem tonga oa liasü. Lendong agi kongshia alir yimtaklir 500 tashi tejenoktak semtu nung lir.