Arunachal nung Ultra-Light Howitzers amenoktsü

Guwahati, Mongputeni/October 8 (Agencies): Anüdoklen Indian Army tashi tali itshidaktsütsü asoshi Indian Army-i Arunachal Pradesh nung M777 Ultra-Light Howitzers amenoktsü asoshi telemtetba agiogo.
Army nung source ka ajanga ashiba agi, Howitzers ya Tawang, Kameng aser Walong nung amenoktsü.
Arunachal Pradesh-i yoka aliba artillery regiment tem ya M777 amshitsü asoshi tesayuba agütsür lir.
Kasa mapang nung Chinese tir Xi Jinping-i taruba hopta India semdangtsü imlar aser kidanger linük yagi India Army-i Him Vijay sentong agitsü telemtetba atema tebilemtsü kaa bilemba lemsatepogo. Him Vijay ya tenem nung combat exercise tulutiba lir.
US Army-i M777s ya Afghanistan aser Iraq nung amshiogo aser Australia, Canada aser Saudi Arabia nunga ali nung raraba sepaitem amshir.
M777s ya Afghanistan rara nung mezüngbuba amshia liasü.
Osang ajangasa ashiba agi, Army-i Ladakh aser Arunachal Pradesh nung 145 Howitzers regiment tenetshi yoktsü asoshi sentong lir.
Howitzers amenokba ajanga Ladakh aser Arunachal Pradesh nung China den arrtsü kümzüka toktsütsü.
“Howitzers tem ya tayimtsü agi LAC anasa tonga bener otettsü. Iba ya Arunachal Pradesh anüdoklen lenmang sadema maliba tesemtem atema teyari tulu asütsü,” ta source ajanga metetdaktsü.
Maneni source ajansa, Howitzers ya Chinook helicopter-i bener oa Walong Advanced Landing Ground nunger amala nung toktsütettsü, ta ashi.