Arunachal o Manipur na nung Khristan nütsüng züindar

New Delhi, March 30 (Agencies): 1971 küm Arunachal Pradesh state nung Khristian nütsüng shilem 1 dang nungi tajemba liasü, ajisüaka 2011 küm tashi nungbo Khristan nütsüng shilem 30 dak tema kümogo.
Ano Manipur state nunga 1961 küm Khristan nütsüng shilem 19 dang aliba nungi 2011 küm tashi nungbo Khristan nütsüng shilem 41 dang nungi timba kümogo, ta census data ajanga sayur.
Union Minister, Kiren Rijiju-i par state (Arunachal Pradesh) nung Khristan nütsüng züinba aser Khristan yimsü dangi meyipdaktsüba indang jembiba ajanga tashishitep aser mangatettep adoka liasü.
Taoba mapang Rijiju-i, “India nung Hindu nütsüng kanga ajema akumer, kechiyong Hindu nungeri kodanga tangar par yimsü dangi memeyipdaktsür,” ta jembia liasü.
Ajisüaka state ana nung ya Khristan nütsüng züinba kuli tejangja mangur.
Rijiju-ibo, iba ya tamangba yimsü dangi meyipdaktsüba ajanga lir ta ashi, ajisüaka mongin karibo, iba ya pei li toktsür tangalen oa aliba ajanga lir, ta ashir.
Opposition party temi Rijiju-i jembiba o aitsüba den külemi Congress Party-i, “BJP-i Arunachal Pradesh ya Hindu state ka kümdaktsür,” ta aija liasü.
Northeast nung state tulutiba, Arunachal Pradesh ya ‘Other Religions’ category nung lir, aser 1971 küm Arunachal Pradesh nunger shilem asemsü nung shilem ana aliba 2011 küm tashi nungbo parnok shilem 26 dang tajemba akum.
2011 küm census nung Arunachal Pradesh nütsüng ya shilem million 1.3 shi lir.
Ano nütsüng million 2.8 aliba state, Manipur nung 1961 küm Hindu nunger shilem 62 tashi liasü aser Khristan shilem 19 liasü, saka 2011 nungbo Khristan aser Hindu naprong shilem 41 shi lir.
State ana nütsüng senteper India nütsüng shilem 0.3 dang lir, Khristan nütsüng crore 2.78, shilem 2 shi dang lir.
Centre for Policy Studies nungi JK Bajaj-i, Arunachal nung, talisa Nocte aser Wancho tribes tashiyim agi Khristan tamangba yimsü dangi meyipdaktsür, ta ashi.
Ajisüaka tamangba yimsüi meyipdaktsüba ajanga Khristan nütsüng züiner ta asuba kuliji aikati magizükteter.