Arunachal Pradesh inyakyim ajanga Manipur election nung kongshitsü: PPA

Guwahati, January 6 (Agencies): Tawa Arunachal Pradesh(AP) nung yimden yimsüsübaren nung temelenshi adokba ajanga Manipur nung agitsü aliba election nung kongshitsü, ta BJP nem kokdaktsür aliba People’s Party of Arunachal (PPA) telok ajanga osang metetdaktsü.
PPA telok nungi Chief Minister Pema Khandu densema MLA 33, BJP dangi December 31 nung meyipa aoba ajanga Arunachal Pradesh nung PPA teloki yimden yimsüsüba menden nungi alutsüsa aküm, aser iba ajanga Northeast nung regional party temi tentetba North East Democratic Alliance (NEDA) nung tarak kettsür, ta PPA leniri ashi.
Assam election nung BJP teloki takok anguba sülen, BJP-i anir Congress masüba regional party temi taoba küm July ita NEDA tenteta liasü. Manipur nungi NEDA nung party keta dena mali, saka NPF bo tena lir. Nagaland nung NPF telok ya yimden yimsüsüba nung tanir lir, aser Manipur nung Naga nunger aliba tesemtem nung NPF teloki takok angutsü imlar. Arunachal Pradesh nung PPA telok ya BJP den tesentaktep alitsü-malitsü, ano telemtetba kati maru lir.
“Arunachal Pradesh yimten yimsüsübaren nung tawa atalokba ya NEDA atema majung lir. Regional party aser BJP külemi inyaktsüla. Kechiyong temolung melemtepra, NEDA nükjidong mataloktsü,” ta PPA mendenbuba, Kamen Ringu-i osangbener dang shia liasü.
“BJP nung iba tebilemba lira, regional party tem asoshi tebilemtsü lir,” ta PPA tongti Kahfa Bengia-ia shia liasü.
Ajisüaka, Arunachal yimten yimsüsüba nung temelenshi aruba ajanga NEDA aser Manipur election nung kecha masütsü, ta BJP-i ashir.
“BJP-i Manipur election nung kanga junga inyaktsü. NEDA nükjidong nung mekongshitsü. PPA teloki Arunachal Pradesh chief minister Pema Khandu, deputy chief minister Chowna mein aser MLA tem parnok mapa nungi khen atema anentsüba ajanga BJP kanga mejungi amshi,” ta Arunachal state BJP tir, Tapir Gao-i metetdaktsü.
Osang ajanga ashiba agi Hombarnü amentsü aliba NEDA senden nung Arunachal yimten yimsüsüba nung temelenshi adokba indang jembitsü tebilemba lir.