Arunachal Pradesh nung AFSPA ita 6 atsülangtsü

New Delhi, Mongputeni/October 4 (Agencies): Centre sorkari Arunachal Pradesh kübok district asem aser Assam den arrtsü nung aliba police station ti nung maneni ita trok atema AFSPA (Armed Forces Special Powers Act) benokogo. Northeast nung telungpurtem inyakyim maneni aoba dak ajemdaker iba act ya Arunachal nung maneni atsülangtsüogo.
Ministry of Home Affairs sangdong ka ajanga, Arunachal Pradesh kübok Tirap, Changlang aser Longding districts aser Assam den arrtsü nung police station ti, Armed Forces (Special Powers) Act (AFSPA), 1958 kübok “disturbed” area ta sangdongogo.
“Ajungji Arunachal Pradesh kübok Tirap, Changlang aser Longding district aser Assam den arrtsü nung aliba police station ti temeket nung aliba tesemtem, Armed Forces (Special Powers) Act, 1958, Section 3 kübok Mongputeni/October 1, 2018 nü nungi tenzüka iba act jilia maginra, 2019 Metsüremi/March 31 tashi ‘disturbed area’ ta sangdonger,” ta sangdong nung shia lir.
Police station tem rongnung West Kameng district kübok Balemu aser Bhalukpong police stations, East Kameng district kübok Seijosa police station, Papumpare district kübok Balijan police station, Namsai district kübok Namsai aser Mahadevpur police stations, Lower Dibang Valley district kübok Roing police station aser Lohit district kübok Sunpura police station densema lir.
District asem aser police station ti nung temzüng ozüng dak sendakba nung ken o tem asadanger iba telemtetba agi, ta home ministry ketdangser kati ashi.
Temetettsükaji telungpur telok; National Socialist Council of Nagaland (NSCN-K), United Liberation Front Of Assam (ULFA) aser National Democratic Front of Boroland (NDFB) nunger Arunachal Pradesh kübok item tesem nung awawaa inyakdar.