Arunachal Pradesh nung anentsüh alua nisung 14 asü

Itanagar, July 11 (Agencies): Mongulbarnü Arunachal Pradesh nung Papum Pare district kübok yimtsüng ka nung anentsüh tulu ka alua ki pungu anenbang aser iba lendong nung nisung 14 taküm samar alitsü ta osang angazüker.
Tzünglu kanga aruba ajanga anentsühji Laptap yimtsüng nung atalok.
Taoba hopta iba tesem nung anentsüh aluba ajanga nisung 150 tashi taolen maka kümer anogo asemnü tashi lir ang Indian Air Force helicopter kati parnok kümzük. Ajisüaka, helicopter ji tsüoka nisung pezü asü.
Tanü anentsüh tulu aluba sülen züngsem 35 adenba NDRF telok ka yimtsüng tonga ogo aser parnoki idakji alirtem den yaritepdar. Tang tashi nung tasümang pungu tashi anentsüh nungi agitetogo.
Arunachal Pradesh Chief Minister, Pema Khandu-i iba osang angashi aoksar aser temulung raksar ta metetdaktsüogo aser paisa rescue operation inyaktsü atema tetuyuba agütsüogo.
Khandu-i lendong ataloktsü akok ta temulung melemi bilemba tesemtemi maotsü aser süngdonglidong mashi matsüngtsü atema nübortem dang metetdaktsü.
Paisa, tasür kibong shia nem sen lakh pezüzü teyari agütsütsü ta sangoktsüogo.
Assam nunga tanü nisung 3 tzümetsüng aser anentsüh lendongtem nung asü. Tanü asürtem dena tesüiba anogo 15 tsüngda Assam nung nisung 33 taküm samaogo.