Arunachal Pradesh nung IAF chopper ka sama

Itanagar, July 4 (Agencies): Mongolbarnü Arunachal Pradesh, Papum Pare district kübok Sagalee tesem anasa Indian Air Force light weight helicopter (HAL Dhruv) ka nung nisung asem mener samaba tang tashi monguteter, ta Defence osang ka ajanga metetdaktsü.
IAF ALH chopper nung nisung asem mener Sagalee aser Itanagar na tsüngda lenmang nokdanger aliba ajanga nisung senzüsenpong mejungi alirtem anri arutsü asoshi yok.
Osang ka ajanga ashiba agi, chopper nung flood relief package tem bener Itanagar nungi Naharlgar-i oya liasü aser parnok den tanü 3:30 tashi nung tatembangbuba jembiteba liasü.
Maneni tanep Union Minister of State Kiren Rijiju mener aliba chooper tsüngsang majungba ajanga Itanagar nung emergency landing süa liasü.
“Northeast nung tsüngsang kanga majung. Ni junga dang lir saka kasa mapang nung IAF ALH chopper samara aliba bushitsü asoshi State machinery ajak renemogo,” ta Kiren Rijiju-i ashiba osang ka ajanga metetdaktsü.
“Arunachal Pradesh CM Pema Khandu aser state sorkari IAF helicopter samara aliba bushitsü asoshi local nisungtem ayongdar,” ta Minister of State for Home Affairs, Kiren Rijiju-i shisem.