Arunachal Pradesh nung Measles-Rubella vaccination 100% inyakogo

Itanagar, Rongchii (April) 18 (Agencies): Arunachal Pradesh-i Measles-Rubella (MR) Vaccination Campaign alizüng tongteta inyakba atema Chief Minister Pema Khandu-i health workers nem tenüngsang agütsü.
“Measles aser rubella anema 100 % vaccination tongtetogo, iba mapatong nung helicopters amshi, health workers-i kilometre 9 nungi 9 jaja, tamangba yimsü lenirtemi mapa inyak. Linük nung iba alizüng tongtetba state tem rongnung asenok jenjang pungububa nung lir” ta Twitter nung Khandu-i metetdaktsü.
Arunachal Pradesh nung Tsüklai (February) 1 nü Measles-Rubella (MR) Vaccination Campaign ya tenzük aser ita ka tashi inyakba mapa nung tanur 100% nem mozü agütsü.
2020 tashi nung Arunachal Pradesh nung measles agientsü aser rubella azüoktsü alizüng yur iba mapatong tenzüka liasü.
Chief Minister Pema Khandu-i iba mapatong ya Aenjeti (January) 30 nü tenzüktsü aser anti-Measles-Rubella vaccine ya ita 9 tain nungi arishi küm 15 tsüngda alir tanur lakh 5 shi ka nem agütsütsü atema alizüng ayu.
Measles ya menatepba tashidak ka lir aser alima nung iba tashidak ajanga tanur aika taküm samar.
Rubella ya-a menatepba tashidak ka lir aser tila tanur aser tainlonglong pur dak melamela atonger.
UNICEF India-ia Twitter nung Arunachal Pradesh nem tenüngsang agütsüogo.
“Arunachal Pradesh-i ita ka campaign inyakba nung meales-rubella anema tanur 100% nem mozü agütsüba atema tenüngsang agütsür” ta UNICEF India-i pelaba osang metetdaktsü.
Global Vaccine Action Plan kübok 2020 tashi nung World Health Organization (WHO) tesem 5 nungi measles aser rubella agientsü atema alizüng yua lir.
India nung Tamil Nadu, Kerala, Telangana aser Himachal Pradesh state temi iba alizüng tongtetogo aser pungububa nung Arunachal Pradesh asütsü.
Northeast kübok Assam, Meghalaya aser Manipur state tem nung iba mapa ano metenzük lir.