Arunachal Pradesh nung NSCN-IM züngsem 6 khaset

Itanagar, July 11 (Agencies): Honibarnep Arunachal Pradesh nung sepaitem den khatepdang NSCN-IM züngsem 6 asü.
Longding district kübok Khonsa nung prangpong abenba telungpurtem lir ta osang tejangja angazükba sülen Assam Rifles-i telungpurtem mita ao.
Iba tesem ya Assam kübok Tinsukia nungi kilometer 50 shi dang pilar lir.
Tanep 4:30 ako meta sepaitemi iba tesem nung NSCN-(IM) telungpurtem den denjitep aser parnok tsüngda khatepdang Assam Rifles sepai ka yiru.
Assam Rifles sepai temang tajungba lir aser pa military hospital kati anir ogo ta osang ajanga ashi.
Iba tesem nungi AK-47 pezü, Chinese MQ ana ngutetogo, ta DGP Arunachal Pradesh, RP Upadhyaya-i ashi.
Ninu tesem nung Capt Somnyam Tangkhul aser telungpur pungu anenzüka lir aser parnoki market president & secretary, Longding aputsü tasa atonga lir ta osang balala ajanga angazük.
Osangtem nungji ajemdaker 6 Assam Rifles aser Longding Police nungi telok aika lemsar telungpurtem mita ao.
Tanep 4:30 ako meta Ninu aser Ngissa tsüngda arem nung 6 Assam Rifles-i mezüng telungpurtemji angu.
Iba sülen tanüngba teloktemi telungpurtem longbanger ghonda ana shi khatep.
Iba tesem nung CO 6 Assam Rifles aser Superintendent of Police, Longding naprong liasü.