Arunachal Pradesh nung rara mesükba tensa mali : Nabam Tuki

New Delhi, January 30 (Agencies) : Honibarnü BJP MP Shatrughan Sinha-i Arunachal Pradesh nung rara mesükba tensa mali ta jembibaji shitak ta taoba Arunachal Pradesh Chief Minister Nabam Tuki-i metetdaktsü.
Arunachal nung tensa junga dang lir anungji kechiba Centre-i President’s rule agütsü ta yashi Shatrughan Sinha-i asüngdang.
“Shatrughan Sinha-i jembiba onük ajanga pai Arunachal Pradesh nunger khuret angateta lir ta kuli sayur. Linük ajungai Arunachal dak tim asüba mapa inyakogo ta meteta lir aser onoki Supreme Court nungi temeten angutsü atar” ta Tuki-i osangbener dang ashi.
Arunachal Pradesh nung rara mesükba tensa lir ta Centre-i kuli agütsübaji tiyazü aser parnoki state sorkar dang masüngdangtepi osang prokshi, ta Tuki-isa ashi.
“Centre-i agütsüba osangji shitak masü aser külen tsütsü dang repranger parnoki kuli agütsü. Centre-i state sorkar mesüra district administration den asüngdangya kecha masü. Iba osangji nisung kati dang agütsü. State nung rara mesükba tensa maliasü aser iba amaji mataloktsü” ta Tuli-isa metetdaktsü.
Centre-i Arunachal Pradesh nung President’s Rule alitsü temelaba agütsüba atema BJP MP Shatrughan Sinha-i Centre aitsür.
Sinha-i Prime Minister Narendra Modi’er “advisor” tajungtem luja jembi aser Supreme Court-i parnok aitsüra, parnoki kechi telangzübatemsa agütsütsü, ta paisa asüngdangogo.
“Asen PM dak ni tamanga akar, saka Arunachal Pradesh nung President’s Rule alitsü atema pa nem shisatsü shibai agütsüar ni kanga süngmanger. Iba onük ya Supreme Court nung benoka angadangba mapang ka nung Centre-i President’s Rule alitsü temelaba agütsü. Kechiba yamaji aritepa aser shisabulua telemtetba agi’ar ni kanga ratar” ta Sinha-i yashi metetdaktsü.

You must be logged in to post a comment Login