Arunachal Pradesh nung tai tongloktsütep tenzükogo

Itanagar, January 28 (Agencies): Centre sorkari Arunachal Pradesh nung President’s Rule benoktsü lemtetba sülen taoba chief minister Nabam Tuki’er district, Papum Pare nung vote agütsürtem aser Congress nung inyakertem tai tongloktsütep tenzüka telemsa adokogo.
Arunachal state nung President Rule benokba atema Congress pusemer aikati Centre sorkar aitsür, ajisüaka ano külenbo vote agütsürtem aiakti ruling party Congress nem tai tongloktsür.
Party nung inyakertemi ashiba agi, iba tentet nung telemdangji tiyong asütsü ta bilem, kechiyong Congress MLA 47 nungi MLA 21-i dang Tuki lenisüba anema noktak.
“President’s Rule benokba ya tim masü. Iba ya ajanga state sorkari benoka inyakba terenlok mapa anüa akumtsü. Talisa iba ya ajanga sensakertemi timtem balala ajurutsü,” ta Tuki adokba constituency Sagalee nungi Congress lenir, Techi Takar-i ashi.
“Iba ya Union MoS for home affairs Kiren Rijiju-i tasa tamajung atongba ka lir, pai state nung BJP sorkar tashii aruner. Pa mangdangji kodanga mataloktsü,” ta Doimukh nungi Congress nung inyaker Nabam Teki-i ashi.
Ano Nirjuli nungi Congress nung inyaker L Bengia-ibo, Supreme Court tiyongtsüi aitba sülen Tuki’er sorkar maneni arutsü, ta tamang kaa jembiogo.
“Mapang tom nung election agibaji state aser Centre naprong atema khuret ka asütsü,” ta paisa ashi.
Ajisüaka BJP-ibo Congress nem tai tonglokja, “State terenlok nung takoksa ajurutsüsa party nung telemsa adoka raraba ajanga Congress lenirtemi nüburtem tebilemba mataloktsür,” ta aitsüogo.