Arunachal Pradesh nung yipru tesashi ait

Itanagar, May 17: Yipur ajanga süngtong tera dena raktettsüba agi iba anasa aliba garitem raksatsüba noksa nung angur.

Itanagar, May 17 (Agencies): Arunachal Pradesh nung tzünglu dena yipru tesashi aitba ajanga nisung ka tepset aser ki aika raksaja nisung 100 shi talidak makai kümogo.
Hombar nikongtsütsü yipru aitba mapang ki ka jerepa Namsai district kübok New Mohong tesem nung alir Khonil Gogoi tepset, ta Bodhbarnü ketdangsertemi metetdaktsü.
Yipru ya minute 90 shi ait aser iba ajanga ki 180 kenyongi raksatsü aser ano tanga ki kar terara raksatsü. Yipur ajanga süngtong tera dena raktetba den külemi power line tokdangtsü aser shiruru metsüba ki aser tsük bendena ayuba jen aika raksatsü.
Lekang circle nung yimtsüng aika sendaktepba lenmang süngtong tera den mekübtetba ajanga nokdanga liasü. Police aser local ketdangsertem lenmang lapoktsü mapa inyak tenzükogo.
Deputy Chief Minister Chowna Mein shiba iba tesem nungi MLA lir, pai iba lendong nung nisung taküm samaba atema nemjema bilemba lemsatep.
Pai district administration dang yipru lendong ajang timtema aliba nüburtem nem teyari tenüngdakbatem tekaraba nung agütsütsü asoshi mepishe.
Tzünglu maneni aruba ajanga Kameng district kübok Dirang tesem nung tzümetsüng arua liasü aser iba ajanga sorkar aser kicha meyong kiojen aser oset aika raksatsüogo.
Tzümetsüng ajanga ADC Dagbom Riba’er official ki aser local MLA Phurpa Tsering’er kia dena terara raksatsü.
BSNL exchange kanga mejungi raksaogo aser iba ajanga mobile service nung kongshiogo.
Electricity, tzü agütsüba aser lenmang raksar aliba yanglushitsü asoshi ketdangsertemi inyakdar ta osang ajanga metetdaktsü.
Maneni yipru ajanga Kurung Kumey district, Parsi-Parlo circle kübok Riangchi-Poriang yimtsüng nung teraksa bener arutsüogo.
Hombar nü yipur ajanga iba yimtsüng nung ki aika raksatsüba den külemi Anganwadi Centre ka aser sentep ki ka ta raksatsü.
Süngjang tong noklang aika aser au rongtem yipru ajanga tera dena raktettsüogo.
Kasa mapang nung Chief Minister Pema Khandu lendong agi kongshia aliba tesemtem nem teyari agütsütsüba aser ki o jen yanglushiba maparen tenzüktsü asoshi tetuyuba agütsüogo. Pai maneni district administration dang lendong nung takoksa aluba jenjang asadangtsü asoshi tetuyuba agütsü aser nüburtem dang iba amala lendong nungi jenbua alitsü asoshi kümdanga alitsü ajungshiba osang ajanga metetdaktsü.