Arunachal Pradesh nung yipru tesashi aon

Itanagar, March 28 (Agencies): Arunachal Pradesh nung Tirap district kübok Deomali tesem nung yashi yipru den tzünglu tesashi aruba ajanga kiojen aika raksatsü aser süngdonglidong aika tera meküpa laodaktsü.
Iba yipru ajanga power station aika raksatsüogo aser itemji yanglutsü asoshi mapang tatsü kabo agitsü, ta ketdangsertemi ashi.
Deomali tesem nung süngdonglidong tera dena meküpa laodaktsüba ajanga lenmang aika nokdanga lir aser item lenmangtem lapoktsü asoshi iba tesem nung aliba ketdangser aser police temi mapa inyakdaki.
Yipru ajanga Assam nung aliba Naharkatia aser Khonsa tsüngda lenmang nung süngdong aika laodaktsü aser Narottam Nagar nung aliba Ramakrishna Mission School kanga mejungi raksatsü.
Iba tesem nungi MLA aser Agriculture Minister, Wangki Lowang-i teyari agütsütsü shiogo aser Additional Deputy Commissioner dang teyari agütsütsü shiogo.
Power department, forest department, Panchayati raj nung lenirtem aser lokdi balala dang iba lendong ajanga timtem agütsür yaritsü asoshi paisa ajungshi.