Arunachal Pradesh sorkari Khristantemi ashiba makoker

Guwahati, October 27 (Agencies): Arunachal Pradesh cabinet-i state nung lisopur tamangba yimsü aser sobalibatem kümzüka ayutsü atema department balaka tentettsü mapa inyak saka iba nung tetsükdaktsü ka ajuruogo.
Arunachal Christian Forum (ACF)-i anema nokdakba agi Pema Khandu-i aniba BJP sorkari “Department of Indigenous Affairs” ta ajatsü lemtetogo.
ACF purji October 29, 2017 nü senden amentsü.
“Tang atemabo, onoki sorkar telemtetba agizüktsü mesüra magizüktsü ta meshitettsü. Onok October 29 nü ajurutepba sülen ang telemtetba ka agitsü” ta ACF general secretary Toko Teki-i osangbener dang ashi.
Taküm August ita CM Khandu-i anir state cabinet senden amendang “Department of Indigenous Faith & Cultural Affairs” tentettsü mulunga agizük.
“Alima ainba ajanga state nung lisopurtem pei sobaliba aser oshitem nungi pilaa aoer. Iba jagi onoki sobaliba aser oshioben wazüka aser kümzüka ayutsü atema inyakyim kar alitsüla” ta Chief minister-i indangji shia liasü.
Iba sülen, Khristan teloktemi iba telemtetba anema nokdak aser idangji Khandu-i department balaka tentetbaji tamangba yimsü anema masü ta ashi.
Ajisüaka, Khristantemi ashiba agi, lisopurtem indang tamangba yimsütem kümzüka ayutsü atema ta ser department ka tentetbaji, state sorkari Khristan arogo anema inyakba mapa ka lir.
“Arogo anema parnoki mapa inyaktsü meranger, saka sorkari tamangba yimsü dak sendakba maparen nung teka maitsüla aser tamangba yimsü ajak kasa dang ta züngshitsüla” ta ACF general secretary, Teki-i ashi.
Lisopurtemi onük balala ajanga Khristan yimsü agizüker. Khrista indang tesayubatem ajanga nübortem temulung süneptsür aser taküm melenshidaktsür. Iba jagi küm shia Khristantem nütsüng renloker, ta paisa shisem.
“Khristantemi dang masü saka Buddhist temia sorkar inyakyim anema nokdaker. Arunachal Pradesh nütsüng yongsük nung Buddhist nungerji noklang nung shilem 11-12 shi ka dang lir saka onokbo shilem 30 dak tema lir. Department jagi Khristantem alidak dang iba mapaji inyaktsü aser iba jagi onoki talisa anema nokdaker” ta Teki-ia metetdaktsü.