Arunachal Pradesh sorkari National Food Security Act tenzüktsü

Itanagar, November 13 (Agencies) : Chief Minister Nabam Tuki-i Arunachal Pradesh nung National Food Security Act tenzüktsü atema mapa inyaker.

Taküm December 1 nungi Arunachal nung National Food Security Act-2013 mapa küma tenzüktsü atema state sorkari sentong renemogo, ta sorkar sangdong ka nung metetdaktsü.

Food & Civil Supplies department den senden ka agidang Tuki-i National Food Security Act kübok mapa shitak inyaktsü tayongzükba agütsü.

Iba Act kübok itashia jang seret nung sen 3 yong nisung ka nem seret 5 aser kibong ka nem seret 35 agütsütsü lateta lir.

Iba dak sendaka nung state sorkari Food Commission ka tentettsü aser parnok den yariteptsü atema Arunachal Pradesh State Women Commission nem mapa lemzüktsütsü ta senden nung telemtetba agi.

Sorkari telemtetba agiba rongnung tongtibang kaji Food Corporation of India (FCI) mesüka state corporation ka tentettsü atema lir. Iba asoshi Principal Secretary Finance chairman ser Secretary Planning, Secretary Food & civil supplies aser director food & civil supplies nungertemi mapa inyaktsü shimogo, ta sorkar sangdong nungsa metetdaktsü.