Arunachal SIT-i ULFA-I commander apu

Itanagar, November 18 (Agencies): Deobarnü Arunachal Pradesh Police indang Special Investigation Team (SIT)-i ULFA-I commander Ranjan Bikash Borgohain apu.
Pa dang Bikash aser Ramen Barua ta-a ajar.
Superintendent of police (SP), SIT, Dr. Navdeep Singh Brar-i anir police inspector N. Lali aser inspector P. Nikang nungertemi pa apu.
Arunachal Pradesh Police (HQ), Itanagar indang PRO-i sangdong ka nung ashiba agi, “ULFA-I züngsem yagi Arunachal Pradesh dena Northeast nung yimsüsür tongtitem dang nungi tashiyim agi sen meshi.”
ULFA-I indang deputy commander-in-chief Drishti Rajkhowa-i sign aliba shidi aika pa ket nung lia apu. Shiditemji party balala nung lennirtem dangi züluba liasü, ta PRO-isa ashi.
Ranjan Bikash Borghain ket nung diary ana den yimsüsürtem indang address aser phone number tem, bank balala indang debit/credit card 5 aser mobile phone 3 apu.
“Ita ka shi Delhi, Dibrugarh aser Guwahati nung tesem aika mita aruba sülen, tatem nung Ranjan Bikash Borghain puogo” ta Arunachal Pradesh Police PRO-isa metetdaktsü.
Pa apuba sülen okadaki anir ao aser okadaki pa anogo tenetnü police ket nung ayutsü temelaba agütsü.
Pa dang asüngdangya asüdang pa taoba mapang Delhi Police-i apuba aser Tihar jail nung ayuba nangzükogo.
Ranjan-i ULFA den tesentaktep alibaji 1985 nungi bushiteta lir. Pai züngsem tasentem aniokba mapa nung kanga shilem agi. Pa dang maneni asüngdangya südar, ta Arunachal police-isa ashi.